lunes, 3 de julio de 2017

galegoespañol

Fotógrafos da Natureza

2017

:· EXPOSICIÓN TEMPORAL
>> Aquarium Finisterrae
Sala Isabel Castelo
3 xullo – 30 outubro 2017

Gañadores do concurso GDT European Wildlife Photographer of the Year 2016.

O certame arrincou no ano 2000, promovido pola Asociación Alemá de Fotógrafos da Natureza (GDT).

Desde entón, o desenvolvemento, prestixio e crecemento do concurso foi extraordinario, traspasando as fronteiras europeas e alcanzando renome mundial.

A sala Isabel Castelo do Aquarium Finisterrae acolle a exposición Fotógrafos da Natureza 2017, que contén as fotografías galardoadas na edición do 2016 do concurso GDT European Wildlife Photographer of the Year.



A mostra recolle impresionantes imaxes que ensinan a beleza do noso planeta e a importancia de preservalo. Unha colección que inspira e alenta o interese por coñecer e defender a marabillosa natureza que nos rodea.

O certame está aberto a todos os fotógrafos, afeccionados e profesionais, que estean interesados en mostrar a súa obra nalgunha das 9 categorías establecidas: aves; mamíferos; outros animais; plantas e fungos; paisaxes; mundo submarino; home e natureza; natureza de estudo e novos fotógrafos.

Participantes españois
Nesta edición presentáronse preto de 18.000 fotografías, procedentes de 38 países, das que se seleccionaron as 84 gañadoras e finalistas en cada categoría que compoñen a exposición. Entre elas están as imaxes de 9 fotógrafos españois, 3 deles gañadores nas categorías de paisaxes, natureza de estudo e mellor fotógrafo menor de 14 anos.

GAÑADOR ABSOLUTO
"Respirando na noite polar",
de Audun Rikardsen (Noruega).

O autor conta como logrou esta imaxe: "A principios de xaneiro, nun fiordo preto de Tromsø, no norte de Noruega, un barco de pesca arrastraba as súas redes mentres un grupo de orcas trataba de alimentarse.

O frío extremo e a alta humidade crearon unha máxica bruma no mar. O meu barco, a miña cámara e ata eu mesmo estabamos cubertos de cristais de xeo, o que converteu a fotografía nun verdadeiro desafío. Tardei horas antes de lograr finalmente capturar a unha orca respirando na superficie do mar.”


:· MÁIS FOTOGRAFÍAS
Galería de la exposición | GDT
Consulta as fotografías gañadoras na edición de 2016 do prestixioso concurso europeo de fotografía de natureza.



 

© 2017, Museos Científicos Coruñeses (Concello da Coruña) | Comentarios e suxestións