lunes, 1 de mayo de 2017

galegoespañol

XXII Día da Ciencia na Rúa

2017

:· ROMERÍA CIENTÍFICA

CANDO E ONDE
Sábado 6 de maio de 2017
Parque de Santa Margarita. A Coruña
De 11 da mañá a 7 da tarde

DESCARGA
Programa completo
(PDF, 4 MB)
Centos de estudantes e profesores de 36 centros educativos, así como membros de numerosas entidades encherán con actividades as jaimas e espazos de lecer instalados nas inmediacións da Casa das Ciencias.

Os 3 Museos Científicos Coruñeses súmanse ao Día da Ciencia na Rúa cunha xornada de ENTRADA GRATUÍTA desde as 11 da mañá.


Un ano máis os alumnos e profesores de centros escolares serán os protagonistas desta festa da ciencia. As jaimas, instaladas ao aire libre no coruñés Parque de Santa Margarita, acollerán as numerosas e variadas experiencias que os estudantes prepararon para o público asistente: formación de nubes, extracción de ADN da saliva, experimentos para fabricar cores por ósmosis, actividades sobre hábitos saudables, ilusións ópticas, xogos con imáns, recoñecemento de impresións dixitais... e tamén actividades deseñadas para os máis pequenos.

O Día da Ciencia na Rúa, que organizan por vixésimo segundo ano consecutivo a Asociación de Amigos da Casa das Ciencias e os Museos Científicos Coruñeses, reunirá nesta convocatoria a máis dunha trintena de centros educativos da Coruña e a súa área metropolitana e tamén de Ribadeo, Betanzos, Mugardos, Carral, Sada e Lugo.

Tamén terán o seu espazo de actividades a Facultade de Ciencias e a Escola Técnica Superior de Enxeñeiros de Camiños da UDC, o Instituto de Investigación Biomédica da Coruña (INIBIC), o Centro Oceanográfico, a Agrupación Astronómica Ío ou o Servizo Municipal de Educación.

Xogos de xadrez, concursos para todas as idades, graffiteros científicos, un espectáculo de maxia, demostracións con impresoras 3D, un concerto da Banda Municipal e, como non, o desfile dos cabezudos de soados científicos serán algúns dos múltiples entretementos que animarán este XXII Día da Ciencia na Rúa.

Museos Científicos Coruñeses
A Casa das Ciencias, a Domus e o Aquarium Finisterrae súmanse á festa cun día de entrada e actividades gratis.
  • A Casa das Ciencias proxectará un maratón de programas de Planetario, con pases ás 11, 12, 13, 16, 17 e 18 horas. 
  • Na Domus proxectarase a película en 3D "Pequenos xigantes", ás 12, 13, 17 e 18 horas. 
  • E no Aquarium o público poderá participar, entre outras actividades, na alimentación das focas ás 12 e 17 horas.
Outras institucións
Ademais, haberá entrada gratuíta e actividades especiais no Museo Nacional de Ciencia e Tecnoloxía (Muncyt), a Torre de Hércules e o Museo Arqueolóxico.

PLANO:
Jaimas e lugares de actividades no Parque de Santa Margarita.




 

© 2017, Museos Científicos Coruñeses (Concello da Coruña) | Comentarios e suxestións